По четири порази во исто толку меѓусебни дуели претходно во Лигата на шампионите, ракометарите на Еурофарм Пелистер конечно го совладаа Загреб со 25:23 на стартот од групната фаза во најсилното клупско натпреварување на стариот континент.
Освен на почетокот од второто полувреме, кога гостите од Хрватска поведоа со 14:12, македонскиот првак постојано имаше предност, во првите десет минути од 8:4, а пет минути пред крајот и 23:20.
Но, некогашниот европски шампион не само што не крена раце, туку и имаше напад за израмнување 19 секунди до последниот свиреж на германските судии, но домашниот голман Саид Хеидарирад одбрани, згора и погоди од гол на гол и со тоа стави точка на драмата во салата „Боро Чурлевски“.
Дејан Манасков со 8 гола од 11 обиди беше најефикасен во победничката екипа, за која капитенот Филип Кузмановски постигна 6 од 10 удари, а Усама Хосни погоди од сите четири обиди.
Иранецот со романски пасош на голот на пелистерци се покажа клучен во второто полувреме, во кои одбрани 6 удари со 31 процент ефикасност.
Десното крило Филип Главаш беше прво име во поразениот тим со 7/8, покрај чуварот на мрежата Анте Грбавац со 9 успешни интервенции (32 отсто).
На 18 септември тимот на Румен Гарабаја ќе му гостува на Пари Сен Жермен.