Кршејќи го отпорот на домаќинот во последните 2,5 минути, машката кошаркарска репрезентација на Македонија ја совлада и Република Ирска во Даблин со 88:76 во претквалификациите за Европското првенство 2029.
Откако ја добија првата четвртина со 27:20, Ирците и во последната влегоа со водство од 62:61 и се закануваа со изненадување до 150 секунди пред крајот, кога беше само 73:72 за „црвено-жолтите“, кои со серија 13:2 во финишот ја обезбедија втората победа во првата рунда од квалификациите.
Џејкоб Вајли беше најкорисен играч во составот на селекторот Маријан Илиевски со 20 поени и 9 скока, а, како и на стартот против Азербејџан во Скопје, најефикасен беше Андреј Јакимовски со 26 поени.
Во другата средба од групата Луксембург беше подобар од Азербејџан со 95:90 во Баку и го дели врвот во групата А со Македонија пред гостувањето во Скопје на 27 февруари.
Во следната фаза од квалификациите одат победниците од трите групи и најдоброто второ место.