Димитар Митровски во наредните три години ќе го носи дресот со број 8 на Олимпија од Љубљана, која ќе му исплати на Вараждин 1,2 милиони евра за македонскиот фудбалски репрезентативец, рекордна отштета за осумкратниот словенечки шампион.
„Од Вараждин во Љубљана. Димитар е змеј. Добредојде во престолнината“, објавија „змајчеки“ на социјалните мрежи.
Играчот за врска со осум настапи за Македонија во неодамна завршената сезона го потврди својот квалитет со 8 гола и една асистенција за вараждинци во Хрватската фудбалска лига (ХНЛ), кои му донесоа место во идеалниот состав на првенството.
Под водство на новиот тренер Жорге Симао, 26-годишниот Митровски наскоро ќе заигра во квалификациите за Лигата на шампионите.