Најдобрата македонска тенисерка, Лина Ѓорческа, со импресивна победа го започна ВТА турнирот W125 Самсун Опен во Турција, совладувајќи ја чешката ѕвезда Каролина Плишкова со 2-0 во сетови (6-4, 6-3) за само 75 минути.
Плишкова, поранешна светска #1 (осум недели на врвот на ВТА листата) и финалистка на Вимблдон и УС Опен, не успеа да се наметне пред силната игра на Ѓорческа.
Лина Ѓорческа, влегува во силна серија на ИТФ турнирите, каде што одигра 57 меча со 38 победи и освои две титули (во Куршумлија и Слобозија). Таа има искуство на тврди терени од 2019 година, кога триумфираше на ИТФ настан во Турција, а во последниот турнир стигна до четвртфиналето. Оваа победа во Самсун не само што ја зголемува нејзината видливост, туку и ја потврдува нејзината способност да се натпреварува со топ-играчи, по претходните успеси против имиња како Анастасија Потапова и Елена-Габриела Руле.
Во втората рунда, македонската тенисерка ќе се соочи со Белгијката Софија Костулас, која денеска ја победи Полјаката Вероника Фалковска со 2-0 во сетови.