Со голот на Јака Малус девет секунди до крајот, ракометарите на Вардар стигнаа до потребната победа од 33:27 над Бенфика го запоседнаа врвот на табелата во групата 3 и во реваншот со Мелсунген на 10 март од 20:45 часот во Касел ќе им биде доволно и реми за директно четвртфинале во Европската лига.
Триумфот од шест гола разлика го анулира поразот од 40:35 во Лисабон и на двократниот европски шампион му обезбеди место во разигрувањето, а изненадувачката победа на Кристијанстад над Мелсунген од 31:30 ја подотвори вратата што води меѓу осумте најдобри екипи во второто клупско наатпреварување на ЕХФ по ранг.
По израмнетото прво полувреме, кое „црвено-црните“ го добија со минимални 15:14, клучна за конечниот исход се покажа серијата на вардарци од четири гола за максимално водство од 27:20 во 48. минута.
Десното крило Вукашин Воркапиќ погоди од сите осум обиди кон противничкиот гол, но бекот Малус беше прво име на средбата со 9/10.