Според специјализираната вебстраница „Трансфермаркт“, фудбалската репрезентација на Велс има пет пати поскап состав од тој на Македонија – 180,18 милиони евра наспроти 37,60 милиони.
Најскап велшки репрезентативец во моментов е десното крило Бренан Џонсон, со пазарна вредност од 40 милиони евра. Членот на Тотенхем има 41 настап и 6 гола за националниот тим, а во тековните мундијалски квалификации погоди еднаш – во поразот од 4:3 против Белгија во Брисел.
Левиот бек на Нотингем Форест, Нико Вилијамс (52 настапи за Велс/4 гола), вреди 24 милиони евра, четири милиони повеќе од дефанзивниот играч за врска на Лидс, Итан Ампаду (59/0), кој ќе отсуствува поради парни жолти картони.
Крилото на Фулам, Хари Вилсон (66/14), кој се враќа во составот по прележаната „жолтица“ и ќе ја носи капитенската лента, има вредност од 18 милиони евра, а во овие квалификации за СП постигна два погодока – по еден во победата од 3:0 над Лихтенштајн дома и во поразот од Белгија од 4:3, кога запиша и асистенција.
Уште две велшки крила имаат двоцифрена пазарна вредност – Даниел Џејмс (60/8) од Лидс од 16 милиони евра и во тековната кампања за СП има еден гол против Казахстан (3:1), како и Дејвид Брукс (40/5) од Борнмут (12 милиони), стрелецот на израмнувачкиот гол во 96. минута во ремито 1:1 со Македонија во Скопје.
Бекот на Лидс, Џо Родон (57/2), вреди 10 милиони евра и погоди по еднаш против Лихтенштајн (3:0) и со Белгија (3:4).
За споредба, најскапиот македонски репрезентативец Елиф Елмас од Наполи вреди речиси колку половина од целиот состав на селекторот Благоја Милевски – 14 милиони евра, а далеку зад него се Бојан Миовски од Глазгов Ренџерс и Енис Барди од Коњаспор со по 3 милиона.
Милионска вредност изразена во евра, според „Трансфермаркт“, имаат уште Столе Димитриевски од Валенсија (2,5 милиони), Дарко Чурлинов од Коџаелиспор и Димитар Митровски од љубљанска Олимпија по 1,5 милион, како и Лирим Ќамили од дански Сондерјиске со 1,2 милиони евра.