Според анализата на британскиот весник „Тајмс“, за десет години, на 7 мај 2036 година, Русија можеби ќе доживее историски момент – инаугурација на нов претседател, по 26 години доминација на Владимир Путин.
Сепак, многу работи остануваат неизвесни. Путин тогаш ќе има 83 години, а според актуелниот устав, неговиот мандат истекува токму во 2036 година. Прашањето е дали тој ќе биде подготвен да ја предаде власта или, како царевите од минатото, ќе се обиде да владее доживотно.
„Тајмс“ потсетува дека кога Путин ја започна војната во Украина во 2022 година, верувал дека тоа ќе му обезбеди место меѓу најголемите руски водачи во историјата. Наместо тоа, лошо изведената инвазија го оставила веројатно послаб од кога било во текот на неговото долгогодишно владеење.
Според протечена проценка на неименувана европска разузнавачка агенција, Кремљ сега е загрижен од можна завера на членови на политичката елита, кои би можеле да го соборат или дури да го убијат со дрон. Поради тоа, безбедносните мерки околу Путин се значително зајакнати, а функционерите кои работат со него имаат забрана да користат телефони со интернет.
Извештајот, исто така, наведува дека Путин и неговото семејство престанале да ги посетуваат луксузните резиденции, а тој со недели престојува во бункери, вклучително и во Краснодарскиот регион.
Можно сценарио за државен удар?
Европскиот извештај посочува дека Сергеј Шојгу, поранешен министер за одбрана и актуелен шеф на Советот за национална безбедност, е поврзан со ризик од пуч поради неговото влијание во воениот врв. Сепак, опозициски политичари во егзил изразуваат сомнеж дека Шојгу има потенцијал или желба да тргне против Путин.
Политичкиот аналитичар Абас Галјамов, поранешен пишувач на говори за Путин, вели дека рускиот претседател „живее од ден за ден“ и активно ги разгледува можните наследници.
Меѓу потенцијалните наследници се споменуваат: Алексеј Дјумин (поранешен телохранител и клучен помошник), Сергеј Собјанин (градоначалник на Москва) и Дмитриј Патрушев (заменик-премиер).