Цените на нафтата паднаа за повеќе од 6% поради растот на оптимизмот дека САД и Иран наскоро би можле да постигнат договор за прекин на конфликтот и за отворање на Ормутскиот теснец. Цената на нафтата Брент падна за 6,07% денеска на 97,3 долари за барел, а фјучерсите на суровата нафта WTI паднаа за речиси 6% под 91 долар за барел.
И покрај оптимизмот од најавите за потпишување на договор меѓу САД и Иран, неизвесноста останува висока, при што официјалните лица од двете страни сигнализираат дека клучните прашања сè уште не се решени и продолжуваат да испраќаат мешани пораки за напредокот на преговорите.
Американскиот претседател Доналд Трамп рече дека „договорот со Иран или ќе биде одличен и значаен, или нема да има договор“, додека портпаролот на иранското Министерство за надворешни работи истакна дека „е постигнат консензус за многу од дискутираните теми, но никој не може да тврди дека потпишувањето на договор е неизбежно“.
И покрај постојаната неизвесност, податоците за следење на бродовите укажуваат на постепено ублажување на регионалните нарушувања, при што неколку танкери за течен природен гас поминаа низ Ормускиот теснец на пат кон Пакистан, Кина и Индија.