Една година откако Џо Бајден се откажа од трката за реизбор, неговиот син Хантер го нападна актерот Џорџ Клуни затоа што водеше јавна кампања со која го повикуваше тогашниот претседател да се откаже од трката.
„Е*и го. И сè во врска со него“, рече помладиот син на Бајден во интервју исполнето со вулгарности со независниот новинар Ендру Калаган, кој има 3 милиони претплатници на YouTube.
„Дали навистина мислите дека во средна Америка, на тој гласач во Грин Беј, Висконсин, му е гајле што мисли Џорџ Клуни за тоа за кого треба да гласа?“, рече хантер Бајден во подкаст со Џејми Харисон, поранешниот претседател на Демократскиот национален комитет.
Клуни беше еден од првите истакнати демократи кои јавно го повикаа Џо Бајден да се откаже од претседателската трка, само три месеци пред изборите. Бајден, тогаш 81-годишен, се соочуваше со растечки сомнежи во сопствениот табор по катастрофалната дебата со Доналд Трамп.
>> Џорџ Клуни: Бајден треба да се пензионира, а не човекот што беше пред четири години
„Го сакам Џо Бајден. Но ни треба нов кандидат“, беше насловот на есејот на Клуни, објавен во „Њујорк тајмс“ на 10 јули 2024 година. Актерот и продуцент, добитник на Оскар, раскажа дека го видел претседателот на холивудска хуманитарна акција еден месец претходно.
„Го сметам за пријател и верувам во него… Тој доби многу од битките со кои се соочи во изминатите четири години. Но, единствената битка што не може да ја добие е битката против времето“, напиша Клуни. Помалку од две недели подоцна, на 21 јули, претседателот го објави своето повлекување од трката.