Европските лидери се согласија да го зголемат притисокот врз Русија преку санкции откако американскиот претседател Доналд Трамп ги информираше за разговорот со рускиот претседател Владимир Путин.
Ова го изјави доцна во понеделник германскиот канцелар Фридрих Мерц, цитиран од Ројтерс.
„Европа и Америка се многу обединети по ова прашање: Ние тесно ќе ја поддржиме Украина на нејзиниот пат кон прекин на огнот“, рече Мерц во објава на ‘X’.
Европа ќе го зголеми притисокот врз Москва преку санкции. „Ова е она за што се согласивме со Трамп по неговиот разговор со Путин.“
Киев и неговите европски сојузници вршат притисок врз Москва за безусловно примирје во војната.
Русија претходно изјави дека е загрижена дека Украина ќе ја искористи таквата пауза за прегрупирање и вооружување.
Помошникот за надворешна политика на Кремљ, Јуриј Ушаков, во понеделник им изјави на новинарите дека Путин и Трамп не разговарале за распоред за прекин на огнот во Украина, но дека Трамп го нагласил својот интерес за брзо постигнување договори.
Европската Унија работи на нов пакет санкции против Русија за да го зголеми притисокот врз Путин поради војната во Украина, изјави минатата недела претседателката на Европската комисија, Урсула фон дер Лајен.