Четири мажи со бугарско државјанство ќе бидат судени во Париз оваа есен за осквернавување на Споменикот на холокаустот во француската престолнина во мај 2024 година, објави канцеларијата на француското обвинителство, пренесува бугарски „Сега“
Тројца од нив се во притвор откако беа екстрадирани од Хрватска и Бугарија. Четвртиот е во бегство, издадена е потерница и може да биде суден во отсуство.
Истражен судија нареди тројцата осомничени да бидат судени за предизвикување материјална штета врз основа на веројатно омраза поврзана со раса, етничка припадност или религија, како и за учество во организирана криминална група.
Четвртиот, кој е осомничен за помагање во резервирање сместување и транспорт за главните сторители, ќе биде суден какосоучесник, соопшти канцеларијата на обвинителството.
Случајот е поврзан со аферата што стана позната како инцидентот „Црвени раце“.
Во ноќта помеѓу 13 и 14 мај лани, на ѕидот на споменикот беа поставени 35 црвени отпечатоци од раце.
АФП забележува дека симболот може да биде поврзан со линчувањето на израелските војници во Рамала на Западниот Брег во 2000 година.
Осомничените се обвинети и за поставување десетици други слични отпечатоци на ѕидовите во две области на Париз.
Нивниот идентитет е утврден благодарение на анализа на снимки од безбедносните камери, податоци од нивните телефони, хотелски и резервации за летови.
Француските обвинители се сомневаат дека вандализмот може да биде „акција насочена кон дестабилизација на Франција, организирана од руските разузнавачки служби“.
Ова, рече државното обвинителство, се вклопува „во поголема стратегија за ширење лажни информации и за поделба на француското јавно мислење или за разгорување на внатрешните тензии“.
Користи луѓе кои не работат за службите, туку добиваат пари за индивидуални задачи преку посредници, „особено во земјите соседни на Русија“, додадоа обвинителите, објацви „Сега“.