Претходните германски влади се обидуваа да ги омекнат најекстремните ставови на Европа кон миграцијата.
Но, сега, под водство канцеларот Фридрих Мерц, Берлин се обидува да ја преземе водечката улога во антиимиграциската политика на континентот.
Новиот курс на Германија отстранува една од главните пречки за воведување политики што до неодамна се сметаа за екстремни – како што се депортирање на мигранти во трети земји или испитување на барањата за азил надвор од ЕУ.
ЕУ се подготвува да воведе серија нови мерки насочени кон остро ограничување на бројот на баратели на азил и зголемување на депортациите.
Додека европските лидери дебатираат како да ги спроведат овие мерки, претставниците од некои од најстрогите земји-членки ја поздравуваат новата улога на Германија.
„Германија води едни од најважните разговори за ова прашање“, изјави данскиот министер за имиграција, Каре Дубвад, за POLITICO. „Среќни сме поради тоа.“
Индикативен за новата улога на Берлин беше гестот на министерот за внатрешни работи Александар Добриндт, кој ги собра колегите од земјите со строга миграциска политика, како што се Австрија, Данска и Полска, на највисокиот врв во Германија – Цугшпице каде златен крст се издига на врвот на планината – што е силен симболичен знак.
„Сакаме јасно да покажеме дека Германија повеќе не е во улога на кочничар по прашањата за миграцијата, туку е дел од движечката сила во Европа“, рече Добриндт.
Пораката е добро прифатена во Брисел.
„Ако Германија придонесе повеќе и е посериозно вклучена, тоа е многу позитивно. Едноставно ќе напредуваме побрзо“, коментираше еврокомесарот за миграција Магнус Брунер.
„Затоа сум многу задоволен што германската влада го избра овој пат и силно ги поддржува предлозите на Комисијата.“