Ирската невладина организација Ирски совет за граѓански слободи (ICCL) поднесе жалба до Европскиот омбудсман, обвинувајќи ја Европската комисија дека користи генеративна вештачка интелигенција, како ChatGPT, за изработка на официјални одговори на барања за пристап до документи, што според нив претставува кршење на сопствените интерни упатства и обврските според европските договори.
ICCL тврди дека во неодамнешниот одговор од Комисијата на нивно барање за документи, метаподатоците откриваат дека барем еден од пружените линкови е генериран со ChatGPT, што се гледа од параметарот „utm_source=chatgpt.com“. Организацијата предупредува дека ваквите системи на вештачка интелигенција често даваат неточни информации, што може да ја загрози обврската на ЕУ институциите за обезбедување точни и транспарентни податоци, како и правото на граѓаните на добра администрација.
„Ова не само што ги повторува зборовите на технолошките извршни директори, туку и покажува дека Комисијата директно ја користи генеративната АИ во јавни документи“, истакнува ICCL во жалбата. Тие додаваат дека според интерните упатства на ЕК, вработените „никогаш не треба директно да го пренесуваат резултатот од генеративен модел на АИ во официјални документи“.
Канцеларијата на Европскиот омбудсман за Euractiv потврди дека ја добила жалбата и дека во моментов се проценува дали да се покрена формална истрага. Европската комисија, пак, одби да коментира, нагласувајќи дека упатствата за персоналот се интерни.