Само еден член на кабинетот го посети светилиштето Јасукуни, место кое азиските соседи на Јапонија го сметаат за симбол на јапонската воена агресија.
Министерот за земјоделство Шинџиро Коизуми, пристигна рано наутро во светилиштето во Токио.
Тој им оддаде почит на 2,5 милиони загинати во војната, вклучувајќи 14 воени лидери осудени за најтешките воени злосторства, како и на повеќе од 1.000 други прогласени за виновни од страна на сојузничките трибунали по поразот на Јапонија во 1945 година.
Коизуми им рече на новинарите: „Важно е никогаш да не заборавиме да им оддадеме почит на оние кои ги дадоа своите животи за својата земја, без оглед на тоа која нација се. Мислам дека тоа е многу важен принцип.“
Премиерот Шигеру Ишиба и царот Нарухито присуствуваа на посебен комеморативен настан, каде што владиниот портпарол Јошимаса Хајаши рече: „15 август е ден за почит кон оние што загинаа во војна и за прослава на мирот. Владата ќе продолжи да изразува благодарност до жртвите на војната и нивните семејства.“
Посетите на Јасукуни се чувствително прашање за Кина и Јужна Кореја, кои постојано ги критикуваат јапонските претставници за обидот да ги омаловажат воените дејствија на земјата.
Последниот актуелен премиер што го посети светилиштето беше Шинзо Абе во декември 2013 година, што предизвика разочарување кај тогашниот американски претседател Барак Обама.
