Возачите во Италија наскоро би можеле да добијат казна до 160 евра ако на одредени автопатски делници возат премногу бавно.
Предложената мерка треба да ја подобри проточноста на сообраќајот и најпрвин би се применувала на автопатите со шест ленти.
На делниците со најмалку три ленти во секоја насока, во левата лента би важела минимална брзина од 100 километри на час.
Ќе останат исклучоци кога знаците наложуваат поинаква брзина или кога условите на патот го бараат тоа – при густа магла, силен дожд, несреќи, градежни работи или застој.
Казните би се движеле од 40 до 160 евра. Тие се дел од нацрт-законот за безбедност во сообраќајот што владата го одобри во октомври и го испрати во парламентот. Мерката ќе започне да важи откако ќе биде усвоен конечниот текст на законот.
Италијанските автопати секоја година ги користат милиони туристи.
Според податоците на агенцијата ИСПРА, пред две години околу 40,7 милиони странски посетители влегле во земјата со автомобил, што е речиси 46 отсто од сите меѓународни пристигнувања.