Властите во САД потврдија дека е уапсен осомничениот за убиството на Чарли Кирк, – 22-годишниот студент од Јута, Тајлер Робинсон. Тој во моментов се наоѓа во полициски притвор, а истрагата околу мотивите и евентуалните соучесници продолжува.
Она што го прави случајот особено шокантен е фактот што токму таткото на Робинсон го пријавил својот син во полиција. Според информациите, тој го препознал Тајлер на фотографиите што ги објави ФБИ и веднаш се обидел лично да го убеди да се предаде, но безуспешно. Откако разговорите не дале резултат, семејството побарало помош од локален свештеник, кој на крај успеал да го убеди младиот Робинсон да се предаде и да биде предаден на органите на редот.
Дополнително, истражителите пронашле рачно напишани пораки на куршуми кои биле оставени покрај оружјето што се верува дека било употребено во нападот. На нив стоеле натписи како: „Hey fascist! Catch!“ и „Oh, Bella Ciao!“ – што уште повеќе ги зајакнува сомнежите дека осомничениот имал силни левичарски политички убедувања и дека делото можеби било идеолошки мотивирано.
Случајот предизвикува огромни реакции во јавноста во САД. Политички лидери веќе зборуваат за „политички атентат“ и бараат најстрога казна за сторителот. Истовремено, се отвораат прашања за безбедноста на јавните личности и за тоа колку идеолошката омраза може да доведе до насилство.
