Истражната комисија на Обединетите нации днеска заклучи дека Израел извршил геноцид во Газа и дека високи израелски функционери, вклучувајќи го и премиерот Бенјамин Нетанјаху, ги поттикнале овие дела – обвинувања што Израел ги нарече скандалозни, јави Ројтерс.
Извештајот на ОН наведува примери за обемот на убиствата, блокадите на помошта, присилното раселување и уништувањето на клиника за плодност за да го поткрепи својот наод за геноцид, додавајќи го својот глас на групите за човекови права и другите кои дошле до истиот заклучок.
„Во Газа се извршува геноцид“, рече Нави Пилај, раководител на Комисијата за истрага на окупираните палестински територии и поранешен судија во Меѓународниот кривичен суд.
„Одговорноста за овие злосторства лежи кај највисоките нивоа на израелските власти, кои речиси две години спроведуваат геноцидна кампања со специфична намера да ја уништат палестинската заедница во Газа“, додаде тој.
Израел одби да соработува со Комисијата. Дипломатската мисија на Израел во Женева ја обвинува комисијата дека има политичка агенда против Израел.
Правната анализа на комисијата од 72 страници е најсилниот наод на ОН досега, но телото е независно и не зборува официјално во име на ОН.
ОН сè уште не го употребила терминот „геноцид“, но е под зголемен притисок да го стори тоа.
Меѓународниот суд на правдата во Хаг го тужи Израел за геноцид.
Но, Тел Авив ги отфрла ваквите обвинувања, повикувајќи се на своето право на самоодбрана по смртоносниот напад на Хамас на 7 октомври 2023 година, во кој беа убиени 1.200 луѓе, а 251 беа земени како заложници.