Според податоците на НАСА, големиот астероид Апофис, именуван по египетскиот бог на хаосот, ќе помине исклучително блиску до Земјата на 13 април 2029 година. Овој „потенцијално опасен астероид“ ќе се приближи поблиску до нашата планета отколку многу вештачки сателити и се очекува да биде видлив со голо око од источната хемисфера, без потреба од телескоп или двоглед.
И покрај драматичната близина, научниците категорично нагласуваат дека нема ризик од судир со Земјата најмалку во следните 100 години. Се проценува дека Апофис ќе помине на само околу 32.000 километри од површината на планетата – растојание кое го прави најблискиот познат прелет на астероид со ваква големина чија патека е прецизно предвидена.
Апофис има пречник од најмалку 450 метри, колку што е висока Ајфеловата кула. Европската вселенска агенција планира да испрати летало кое ќе го следи астероидот за време на минувањето, додека НАСА ја пренамени својата мисија „OSIRIS-REx“ за да го проучува објектот одблиску.
Научниците го сметаат овој настан за еден од најзначајните астрономски настани во поновата историја, бидејќи ваков близок прелет на толку голем астероид веројатно не се случил во забележаната човечка историја.
Апофис е остаток од раните фази на формирањето на Сончевиот систем пред околу 4,6 милијарди години и потекнува од главниот астероиден појас меѓу Марс и Јупитер. Тој беше откриен во 2004 година од американски астрономи, а името го доби по древното египетско божество на хаосот и темнината – Апоп.