Доколку сега се одржат општи избори, 26 проценти од Германците би гласале за AfD, според анкета на Институтот за социјални истражувања и статистичка анализа Форса. AfD го престигна конзервативниот блок CDU/CSU на германскиот канцелар Фридрих Мерц, кој падна на второто место со 24 проценти поддршка во анкетата.
Со оглед на тоа што крајнодесничарскиот Национален собир веќе јасно води во Франција, оваа изненадувачка германска анкета веројатно ќе предизвика вознемиреност кај мејнстрим политичарите низ цела Европа. Десничарските популистички партии остварија силни изборни добивки во последните години од Полска до Романија и од Португалија до Холандија.
Во Велика Британија, крајнодесничарската партија Reform UK на Најџел Фараж е исто така на врвот на анкетите поради широкото јавно незадоволство од лабуристичката влада на премиерот Кир Стармер, објавува Politico.
Иако анализата на неколку анкети покажува дека германските христијански демократи сè уште имаат мала предност пред AfD, крајната десница е во пораст откако освои речиси 21 процент од гласовите на федералните избори во февруари, што е нејзин најдобар резултат во историјата. AfD сега е најголемата опозициска партија во Бундестагот.
AfD е основана пред повеќе од една деценија како партија на група професори по економија кои, во средината на европската должничка криза, се спротивставија на еврото и финансиската помош за презадолжените земји. Во првите години, партијата редовно освојуваше едноцифрени проценти од гласовите на федералните и регионалните избори.
Под водство на отворено радикалната Алис Вајдел, поранешна економистка, AfD сега се залага за тврдокорни антиимигрантски и десничарски популистички политики.
Некои политичари од главните партии тврдат дека партијата е толку екстремна што треба да биде забранета според одредбите од германскиот устав, дизајнирани да спречат повторување на нацистичкото минато.