Венецуелската опозициска лидерка Марија Корина Мачадо го оцени апсењето на Николас Мадуро како „огромен чекор за човештвото, за слободата и човечкото достоинство“. Добитничката на Нобеловата награда за мир за 2025 година изрази благодарност до американскиот претседател Доналд Трамп за акцијата во Венецуела.
Во интервју за „Фокс њуз“, Мачадо истакна дека на новата привремена претседателка Делси Родригез – поранешна потпретседателка на Мадуро – „не може да ѝ се верува“.
Мачадо, која лани месеци се криеше од властите, ја напушти Венецуела минатиот месец за да ја прими Нобеловата награда за мир, доделена за нејзината борба против, како што го опиша Норвешкиот Нобелов комитет, диктаторскиот режим. Таа оттогаш не се вратила во земјата.
Изјавата на Мачадо дојде неколку часа откако Мадуро се изјасни за невин пред федералниот суд во Њујорк по обвиненијата за трговија со дрога и оружје. За време на 30-минутното сослушување, Мадуро се прогласи за „киднапиран претседател“ и „воен заробеник“, истакнувајќи дека „сè уште е претседател“ на Венецуела.
Мадуро и неговата сопруга Цилија Флорес беа заробени во нивниот комплекс во Каракас на 3 јануари 2026 година и префрлени во САД во операција на американските специјални сили.
Овие изјави ја продлабочуваат поларизацијата околу настаните во Венецуела, каде што опозицијата гледа можност за демократска транзиција, додека поддржувачите на Мадуро ја осудуваат акцијата како странска интервенција.