Стотици патници останаа заглавени на Сицилија откако густиот чад и острата вулканска пепел од петдневната ерупција на Етна го блокираа авиосообраќајот и предизвикаа целосно затворање на најголемиот меѓународен аеродром на островот, во Катанија.
Ова е најдолгиот прекин во работата на аеродромот уште од 2002 година, а според последните најави, тој ќе остане затворен најмалку до утре во раните утрински часови. Блокадата се случува во самиот пик на летната туристичка сезона и непосредно пред празников Ферагосто, кога милиони италијански граѓани традиционално патуваат на одмор.
Истражувачот од Националниот институт за геофизика и вулканологија при опсерваторијата на Етна, Борис Бенке, објасни дека острата вулканска пепел претставува сериозна опасност за воздухопловството бидејќи може да ги оштети и задуши авионските мотори. Тој истакна дека оваа активност на Етна е поинаква од претходните.
– Во изминатите неколку децении имаше покуси и посилни ерупции, но оваа е необична поради својата долготрајност и непрекинатото исфрлање пепел – изјави Бенке, додавајќи дека северниот ветер однел помали количини пепел сè до Малта и Северна Африка.
Поради затворањето на пистата во Катанија, која се наоѓа на само 30 километри јужно од вулканот, голем број летови се пренасочуваат кон другите аеродроми на Сицилија. Ова пренасочување предизвика драстично поскапување на такси-услугите и изнајмувањето автомобили, пишува дневниот лист „Кориере дела сера“. Здружението за заштита на потрошувачите „Кодаконс“ веќе најави дека ќе поднесе пријава до италијанското тело за заштита на конкуренцијата поради приговорите за неоправдано зголемување на цените.