Свет

Принцот Хари е подготвен да се врати во армијата и да се бори против Русија

За време на посетата на Лавов, помладиот син на британскиот крал Чарлс Трети изјави дека Украина ќе ја добие војната

Британскиот принц Хари, вториот син на кралот Чарлс Трети од бракот со Дијана, изјави за време на посетата на Украина дека е подготвен да се врати во британските вооружени сили и да се бори против Русија ако има потреба, откри епизода од подкаст што беше емитуван онлајн денеска.

Принцот Хари, кој служеше во британските сили во Авганистан, минатиот викенд беше во ненадејна посета на Лавов, западна Украина, каде што се сретна со ранети британски војници и со нивните лекари.

„Целиот свет може многу да научи од Украина“, рече 42-годишниот Хари во подкастот. „Ако ме прашаат дали би се вратил во војската доколку се појави потреба, сигурно би бил подготвен да ѝ служам на мојата земја заедно со моите колеги ветерани и со припадниците на активната служба“.

Ова е четврта посета на принцот Хари на Украина откако започна руската инвазија во 2022 година. Неговата последна посета беше во април.

Според Хари, Европа е во војна со Русија веќе една деценија. „А ние сме во војна не затоа што беспилотни летала, куршуми и ракети летаат над нас“, рече тој.

„Има толку многу работи што можат да се забележат во светот, особено во Европа, проблеми што влијаат на Европа, што може да се припишат на руското влијание“, додаде Хари.

Според принцот, сега цела Европа е свесна за руската закана и излегува со заеднички фронт против Москва.

„Ќе биде неверојатно да се има корист и од зголемената поддршка од Соединетите Држави“, рече принцот Хари.

Синот на британскиот крал рече дека постои голем јаз помеѓу американското општество, чија поддршка за Украина е исклучително висока, и администрацијата на Трамп. Но, „работите ќе се променат“ по големата победа на демократите на среднорочните избори во САД, увери принцот.

За време на средбата со ранетите војници за време на викендот, Хари рече и дека Украина ќе ја добие војната.

Војводата од Сасекс, кој ја направи поддршката на ранетите војници една од своите главни цели, во 2014 година покрена спортски игри за лица со хендикеп. Следното издание на тие игри треба да се одржи во Бирмингем, Англија, од 10 до 17 јули 2027 година. Украина планира да ја испрати својата најголема делегација досега, со околу 60 спортисти.

 

Најнови вести од: Свет

To top