Рускиот претседател Владимир Путин денеска изјави дека „разбирањето“ постигнато со американскиот претседател Доналд Трамп на нивната средба во август во Алјаска создава можности за решавање на конфликтот во Украина. Ова го истакна за време на самитот на Шангајската организација за соработка (ШОС) во Тијанџин, Кина, каде присуствуваат лидери од Централна Азија, Блискиот Исток, Јужна и Југоисточна Азија, вклучувајќи го и индискиот премиер Нарендра Моди.
Путин изрази благодарност за напорите на Кина и Индија во насока на олеснување на решавањето на „украинската криза“. Тој нагласи дека се надева оти договореното на средбата во Алјаска ќе придонесе за постигнување мир и откри дека работата врз основа на тие разговори веќе е започната. Дополнителни детали, според него, ќе бидат споделени за време на билатералните средби со кинескиот претседател Си Џинпинг и други лидери на самитот.
– За да се постигне одржливо и долгорочно решение, неопходно е да се адресираат корените на кризата, меѓу кои се и постојаните обиди на Западот да ја вовлече Украина во НАТО – рече Путин.
Тој повтори дека, според Москва, конфликтот во Украина не е резултат на „инвазија“, туку последица на државен удар во Киев во 2014 година, кој, како што тврди, бил поддржан од западните сојузници на Украина. Киев и Западот, од друга страна, ја опишуваат руската инвазија од февруари 2022 година како „империјалистичка агресија“, додека Русија ја нарекува „специјална воена операција“ насочена кон демилитаризација и денацификација на Украина.
Самитот на ШОС, опишан како еден од најзначајните од основањето на организацијата во 2001 година, се одржува во време на повеќе глобални кризи што ги засегаат нејзините членки, вклучувајќи ја трговската конфронтација меѓу САД, Кина и Индија, војната во Украина и тензиите околу иранската нуклеарна програма. Кинескиот претседател Си Џинпинг ги пречека лидерите на Русија, Индија, Турција, Иран и други евроазиски земји, со цел да ја позиционира Кина како клучен играч во геостратешката конкуренција.
Состанокот, на кој присуствуваат повеќе од 20 шефови на држави, е проследен со интензивна дипломатија и симболични гестови, како што се заедничките средби на Путин со Си и Моди, и учеството на Путин како почесен гостин на воена парада по повод 80-годишнината од победата над Јапонија во Втората светска војна. Овие активности ја нагласуваат зајакнатата соработка меѓу Русија и Кина, кои заедно промовираат визија за „праведен“ мултиполарен светски поредок.