САД ќе „се бранат себеси и Израел“ ако Иран возврати на израелскиот напад, изјави претседателот Доналд Трамп за Фокс њуз во телефонски разговор со водителот Брет Бајер утрово, објави телевизијата.
Трамп изјави дека разговарал со израелскиот премиер Бенјамин Нетанјаху повеќепати во последните денови и однапред знаел за планираниот напад, додавајќи дека „немало изненадувања“. Сепак, тој нагласи дека „САД не биле вклучени воено“ и изрази надеж дека Иран ќе се врати на преговорите.
„Иран не може да има нуклеарна бомба и се надеваме дека ќе се вратиме на преговарачката маса. Ќе видиме. Има неколку луѓе во раководството кои нема да се вратат“, наводно рекол Трамп, очигледно мислејќи на иранските функционери убиени во нападите.
Иранските медиуми ги идентификуваа жртвите како командант на ИРГК, Хосеин Салами, заменик-началникот на Генералштабот на армијата, Голам Али Рашид, како и нуклеарните научници Мохамед Мехди Техранчи и Ферејдун Абаси.
Трамп додаде дека следи дали Иран ќе возврати. Иранската армија изјави дека нема да толерира израелска „агресија“ и предупреди дека „го чека горчлива лекција Нетанјаху“. Врховниот лидер на Иран, Али Хамнеи, изјави во петокот наутро дека Израел „треба да очекува строга казна“.
„ЦЕНТКОМ е во состојба на висока готовност, САД ќе се бранат себеси и Израел ако Иран возврати“, рече Трамп, според Фокс њуз.
Белата куќа не коментираше за телефонскиот повик.
Пред нападите Трамп напиша на својата социјална мрежа „Трут соушал“ дека САД „остануваат посветени на дипломатско решение за нуклеарното прашање на Иран“.
„Целата моја администрација е упатена да преговара со Иран. Тие би можеле да бидат одлична земја, но прво мора целосно да се откажат од надежите за поседување нуклеарно оружје“, објави тој во четвртокот навечер.
Израелските одбранбени сили (ИДФ) соопштија дека погодиле десетици цели низ Иран, вклучувајќи воени инсталации и објект за збогатување нуклеарно оружје во Натанц. Израелскиот премиер Бенјамин Нетанјаху рече дека операцијата имала за цел да го спречи Иран да се здобие со нуклеарно оружје.
Иранските медиуми објавија дека најмалку пет лица се убиени, а 20 повредени во Техеран по нападите. Нападот се случи само два дена пред шестата рунда нуклеарни разговори меѓу САД и Иран закажани за недела во Оман.