Во услови на интензивни тајни преговори, Вашингтон и Москва работат на амбициозен мировен план за Украина, кој предвидува значителни отстапки од Киев, вклучително жртвување на дел од територијата, откажување од одредени видови оружје и драстично намалување на вооружените сили. Овие детали, според два извори запознаени со процесот, се содржани во американскиот предлог, кој американските претставници му го наметнуваат на претседателот Володимир Зеленски како неизбежна рамка за завршување на војната.
Според новинарот Кристофер Милер од „Фајненшел тајмс“, планот вклучува преполовување на украинската армија, забрана за поседување на одредено тешко вооружување и предавање на контролата врз Донбас под руска власт. „Ова би било еднакво на капитулација на Украина, иако информирани извори велат дека ова се само максималистички барања на Кремљ“, напиша Милер, додавајќи дека Зеленски е „незадоволен“ од ваквиот пристап.
Висок украински функционер откри за агенцијата Ројтерс дека Киев бил целосно исклучен од подготовката на овој план. Украина добила само „сигнали“ за пакетот предлози што Вашингтон ги разговарал директно со Москва, без никаква улога на Киев во нивното обликување. Оваа исклученост предизвикува загриженост во Украина, особено во контекст на продлабочувањето на руските офанзиви и зимските предизвици.
Администрацијата на претседателот Доналд Трамп е оптимистичка дека договорот може да се финализира до крајот на ноември, па дури и „оваа недела“, изјави за „Политико“ висок функционер на Белата куќа, нагласувајќи дека се работи за „голем пробив“. Планот, содржан во документ од 28 точки поделен во четири категории – мир во Украина, безбедносни гаранции за Киев, европска безбедност и идни односи меѓу САД, Русија и Украина – се подготвува тајно, инспириран од моделот за Газa.
Специјалниот претставник на Трамп, Стив Виткоф, го води процесот во консултација со рускиот емисари Кирил Дмитриев, кој ја потврди соработката и ја оцени како перспективна. Американскиот тим смета дека Зеленски, под притисок од тешката ситуација на фронтот и скандали со корупција, ќе мора да попушти. „Навистина не ни е гајле што мислат Европејците. Главната работа е Украина да го прифати“, рече изворот.
Денеска, 19 ноември, Трамп испрати делегација во Киев предводена од секретарот за армија Даниел Дрискол, чија мисија е дел од напорите за мировни преговори. Според американски функционер за Си-Ен-Ен, Дрискол ќе дискутира за условите на бојното поле, потребите од оружје и мировниот процес со Зеленски, пред да продолжи кон Москва. Оваа динамика ја нагласува итноста на Вашингтон, кој го планира планот да му го презентира на украинскиот лидер како „свршен чин“.