Американскиот претседател Доналд Трамп објави дека наредил распоредување на две нуклеарни подморници „во соодветните региони“.
Заканата доаѓа како продолжение на „дијалогот“ што Трамп го води со поранешниот руски претседател Дмитриј Медведев, кој сега е заменик-претседател на Советот за безбедност на Руската Федерација.
Трамп рече дека ги испратил нуклеарните подморници поради „провокативните изјави на Медведев“
„Врз основа на многу провокативните изјави на поранешниот руски претседател Дмитриј Медведев, кој сега е заменик-претседател на Советот за безбедност на Руската Федерација, наредив две нуклеарни подморници да бидат позиционирани во соодветните региони, во случај овие глупави и провокативни изјави да бидат повеќе од обична реторика.
Зборовите се многу важни и честопати можат да доведат до несакани последици, се надевам дека ова нема да биде еден од тие случаи. Ви благодарам за вашето внимание на ова прашање“, напиша Трамп на TruthSocial.
Следеше првата реакција на Русија на објавата на Трамп.
„Во светските океани има значително повеќе руски нуклеарни подморници отколку американски, и тие имаат најмоќно оружје“, изјави за руската државна новинска агенција Тасс, Виктор Водолацки, прв заменик-претседател на Комитетот на Државната дума за прашања на ЗНД, евроазиска интеграција и односи со сонародниците.
Тој додаде дека бродовите што американскиот претседател Доналд Трамп нареди да бидат пренасочени „во соодветните региони“ долго време се под контрола и дека на Русија не ѝ е потребен посебен одговор на изјавата на американскиот лидер за подморниците.
„Не може да има одговор од наша страна, бидејќи совршено добро разбираме кој е Доналд Трамп. Последните месеци покажаа дека тој се предомислува 24 часа на ден“, рече Водолацки.