Кои се црвените линии на Украина за преговорите со Русија?
Претседателот на украинскиот парламент, Руслан Стефанчук, на состанокот на „Кримската платформа“ во Шведска изјави дека за Киев постојат три апсолутни „црвени линии“ кои не можат да се преминат во никакви мировни преговори.
Според него, Украина никогаш нема да прифати:
-официјално меѓународно признавање на териториите окупирани од Русија,
-какви било ограничувања на одбранбените способности на земјата,
-ограничувања на нејзините идни меѓународни сојузи, вклучително и членство во ЕУ и НАТО.
Стефанчук нагласи дека европската и евроатлантската интеграција мора да бидат клучен елемент на идните безбедносни гаранции и да бидат присутни во секој реален мировен план.
Агенцијата Ројтерс забележува дека изнесените позиции на украинската страна се во спротивност со некои од предлозите содржани во мировниот план на САД од 28 точки, кој му беше презентиран на Киев минатата недела.
Меѓу контроверзните елементи, според изворите, се токму прашањата за територијалниот статус, ограничувањата на украинските вооружени сили и фиксирањето на статус надвор од НАТО.
Украина уште еднаш нагласи дека е подготвена да работи на дипломатски решенија, но само ако тие не влијаат на нејзиниот суверенитет, одбранбена способност и слободен избор на сојузи.