Американскиот хеликоптер „апачи“ што се урна во близина на Ормускиот Теснец бил погоден од ирански јуришен дрон „Шахид“, објави порталот „Аксиос“, повикувајќи се на неименуван американски функционер.
Двајцата членови на екипажот на хеликоптерот АХ-64 Апачи беа безбедно спасени во рок од околу два часа по несреќата и се во стабилна состојба, соопшти Централната команда на САД (СЕНТКОМ).
Американскиот претседател Доналд Трамп изјави дека иранската војска нападнала и соборила хеликоптер и најави дека американската армија ќе одговори на нападот.
„Тукушто бев извсстен од нашата голема војска дека Иранците собориле еден од нашите високософистицирани хеликоптери ‘апачи’ кои патролирале во Ормускиот Теснец синоќа. Двајца пилоти биле вклучени во инцидентот и двајцата се безбедни и неповредени. Соединетите Американски Држави мора да одговорат на овој напад“, напиша тој на својот профил на социјалната мрежа Truth Social.
Одговарајќи на пораката на Трамп, иранскиот министер за надворешни работи Абас Аракчи рече дека Ормускиот Теснец не е дел од меѓународните води и дека надлежноста над него е поделена меѓу Иран и Оман и се наоѓа илјадници милји од брегот на САД, додавајќи дека странските воени сили во близина на иранската територија претставуваат постојан ризик.
Аракчи додаде дека Иран го претпочита „јазикот на дипломатијата“, но дека војската на земјата покажала дека може да „зборува и други јазици“.