Украинскиот претседател Володимир Зеленски побара од Европската унија (ЕУ) официјално да одреди датум за пристапување на Украина, објавиа „Фајненшл тајмс“ (FT) и УНИАН.
Во интервју за изданието, украинскиот лидер истакна дека неговата земја очекува процесот да продолжи што е можно побрзо. Зеленски не ја исклучи 2027 година.
„Сакам конкретен датум. Ве молам наведете го“, рече Зеленски.
Тој, исто така, ја нагласи потребата да се спречи блокирање на пристапувањето на Украина во следните 50 години.
„Да не дозволиме идните лидери или следната генерација да се најдат во ситуација каде што Русија може да го блокира пристапувањето на Украина во ЕУ 50 години“, додаде украинскиот претседател.
Според Зеленски, недостатокот на конкретен рок е во корист на Москва и претставува ризик за иднината на Украина.
Шефицата за надворешна политика на ЕУ, Каја Калас, изјави дека европските влади не се подготвени да дадат конкретен датум за пристапување на Украина во ЕУ, и покрај повторените повици од Киев. Калас рече дека сè уште има многу работа што треба да се направи.
Според Ројтерс, пристапувањето на Украина во ЕУ во 2027 година е вклучено во мировниот план од 20 точки на кој Украина, Русија и САД работат во последните месеци.
Сепак, тој датум се смета за нереален во многу европски престолнини.
Летонскиот претседател Едгарс Ринкевичс нагласил дека Украина нема да може да се приклучи на ЕУ сè додека не заврши војната и дека сè уште не ја гледа Русија подготвена за мир.