Русија денеска изјави дека безбедносните гаранции што ги бара Киев во рамките на решавањето на конфликтот во Украина претставуваат „опасност за европскиот континент“. Портпаролката на руското Министерство за надворешни работи, Марија Захарова, нагласи дека Москва ги смета овие гаранции, побарани од украинскиот претседател Володимир Зеленски, за „апсолутно неприфатливи“.
„Ова не се безбедносни гаранции за Украина, тие се гаранции за опасност за европскиот континент,“ изјави Захарова пред новинарите на економска конференција во Владивосток, на рускиот Далечен Исток.
Таа додаде дека Русија одбива да разговара за каква било форма на „странска интервенција“ во Украина.
„Русија нема намера да разговара за странска интервенција во Украина, што би било фундаментално неприфатливо и би ја поткопало каква било форма на безбедност, во кој било формат,“ изјави портпаролката на руското Министерство за надворешни работи.
Денес се одржува состанок на Коалицијата на подготвените, која обединува околу 30 земји, главно европски, подготвени да ја поддржат украинската армија, вклучително и со можно распоредување војници во Украина по постигнување прекин на огнот.
Францускиот претседател Емануел Макрон, Зеленски и други европски лидери утре ќе имаат телефонски разговор со Доналд Трамп по самитот на Коалицијата на подготвените, посветен на безбедносните гаранции за Украина.
Според неодамнешното соопштение од украинското претседателство, разговорите, со кои копретседаваат Макрон и британскиот премиер Кир Стармер, ќе се фокусираат на безбедносните гаранции за Украина