Утрово во стручно училиште во Есен, Германија, 18-годишен ученик ја нападнал својата наставничка со нож, бодејќи ја во стомакот. Според „Билд“, жртвата претрпела сериозни повреди и била итно пренесена во Универзитетската клиника, каде се подготвува за итна операција. Не е познато дали е во животна опасност.
Ројтерс објави дека напаѓачот, кој бил во долготраен конфликт со наставничката, бил застрелан за време на полициската акција за негово апсење и во моментот добива медицинска нега, според германската полиција.
Полицијата реагирала брзо по пријавувањето на инцидентот околу 9:30 часот наутро, а на местото биле забележани голем број полицајци и специјални единици. Над образовниот парк во Есен, каде се наоѓа училиштето, бил забележан и хеликоптер.