Новите барања за азил во Европската унија, Норвешка и Швајцарија значително се намалија во првата половина од оваа година, при што Германија го изгуби долгогодишното прво место како главна дестинација за мигрантите, објави ДПА, повикувајќи се на официјални бројки објавени денеска.
Агенцијата за азил на ЕУ, со седиште во Малта, соопшти дека помеѓу јануари и јуни се поднесени 399.000 нови барања за азил, што е пад од 114.000 или 23 проценти во споредба со истиот период минатата година. Вкупниот број ги вклучува барањата поднесени во сите земји-членки на ЕУ, како и во Норвешка и Швајцарија.
Франција води со 78.000 барања, по што следуваат Шпанија со 77.000, Германија со 70.000 и Италија со 64.000.
Агенцијата за азил на ЕУ го припишува падот во голема мера на падот на режимот на сирискиот претседател Башар ал Асад во декември, што го намали бројот на Сиријци кои бараат азил. Наместо тоа, Венецуелците станаа најголемата група што аплицира за азил, со 49.000 барања, по нив следуваат Авганистанците со 42.000, а Сиријците сега се трети со 25.000. Речиси сите Венецуелци аплицирале во Шпанија, каде што заедничкиот јазик ја олеснува интеграцијата.
Апликациите се намалија во повеќето главни земји-приматели, освен во Франција, при што Германија бележи најголем пад од 43 отсто, по што следуваат Италија со 25 отсто и Шпанија со 13 отсто.