Медиумите во Бугарија не пропуштаат буквално во секоја пригода да ја употребуваат непостоечката, а навредлива етничка припадност „Северномакедонец“ за Македонците, па така постапи и „Телеграф“.
„’Соколите’ експлодираа со три нови играчи. Северномакедонец, Хрват и Мадагаскарец завршија на ‘Коритото’“, е насловот на веста за засилувањата на бугарскиот фудбалски прволигаш Спартак Варна, меѓу кои и 21-годишниот македонски напаѓач Георг Стојановски.
„Висок е 1,87 м и се одликува со брзина, техника и визија за играта. Во својата татковина играл за Вардар, Тетекс, Работнички, Шкупи“ а во Обединетите Арапски Емирати – за Хата клуб. Во помладите години се сметаше за еден од најперспективните фудбалски таленти во Република Северна Македонија, со натпревари и голови во елитата на земјата. Репрезентативец на својата татковина во младинските селекции“, го опишуваат „Северномакедонецот“ од „Телеграф“.
