Министерството за енергетика, рударство и минерални суровини во Република Македонија за првпат воведе системски пристап за активна заштита на државата во сите судски постапки, истовремено покренувајќи нови тужби за наплата на долгови од должници. Оваа промена доаѓа по проценка дека претходно државата била оставена без соодветна правна одбрана во бројни предмети, што довело до ризик од значителни финансиски загуби.
Министерката Сања Божиновска истакна дека во изминатите години не биле оспорувани клучни докази, не биле преземани мерки за застареност на побарувањата и не биле бранети државните позиции. „Во изминатите години државата била оставена без активна правна заштита – не биле оспорувани клучни докази, не биле преземани мерки за застареност на побарувањата и не биле бранети државните позиции. Министерството го менува тој пристап: активно се вклучува во секоја судска постапка, бара стручни вештачења, ја координира одбраната со Владата, иницира постапки за наплата на долгот на државата. Обврска ни е да ги штитиме средствата на граѓаните и ставаме ред во правните постапки“, рече таа.
При превземањето на надлежностите, Министерството затекна шест судски предмети против Министерството за економија во вкупна вредност од 421.862.824 денари. Правниот тим веднаш се активираше, што резултираше со одбивање на две тужби во вредност од 315 милиони денари, заштитувајќи го буџетот од огромни трошоци. Вкупната вредност на предметите против Министерството сега е намалена на 106,8 милиони денари.
Дополнително, увидот во документацијата покажа дека досега не биле поднесени тужби против должници за наплата на неплатени надоместоци. Во соработка со Секторот за минерални суровини, утврдени се застарени и нови побарувања по основ на концесиски надомест. Како резултат, Министерството покрена 17 постапки за наплата на долгови во вкупна вредност од 32,8 милиони денари, од кои дел веќе се завршени со спогодби и позитивни пресуди. Истовремено, на Управен суд се водат околу 20 предмети поврзани со концесии, со позитивна пракса за одбивање на тужби и предлози за временски мерки.
„Нашата должност е да ги заштитиме буџетските средства, да го прекинеме долгогодишниот хаос и да ставиме ред во сите правни процеси. Со тоа ја браниме државата, а пред сè – интересот на граѓаните“, порачаа од Министерството, нагласувајќи дека овој пристап стави ред во судските процеси и го штити јавниот интерес.