„Ние сме 8 милиони Албанци и сме клучен фактор за мирот и развојот на Балканот. Ние се занимаваме со меѓународни договори, додека некои други денес се занимаваат со канализација и асфалтирање. Југославија се растури не поради канализацијата и асфалтот, туку затоа што ги кршеше правата на Албанците!“ – кажа синоќа лидерот на ДУИ Али Ахмети на нивниот предизборен митинг во Студеничани. Неговите закани ги пренесоа информативните портали на албански јазик „Тетова сот“ и „Алфакс“.
Медиумите наведуваат: „Ахмети зборуваше за клучната улога на Албанците во развојот на С.Македонија и на Балканот. Во својот говор Ахмети се изјасни против дискриминацијата врз Албанците и ја нагласи длабоката поврзаност на албанската заедница со нивната територија.“
„Тие јавно излегуваат и велат: ‘Кој сака службен албански јазик, нека оди во Албанија или во Косово’. Ние велиме: не! Затоа што нашите родители не нѐ родиле таму. Ние сме родени тука. Овде ги имаме нашите гробови. Тука сме станале господари на нашата историја.’ – нагласи Али Ахмети.“
Тој истакна дека Албанците се важен фактор во регионот и оти ги поминале темните времиња на Милошевиќ и другите периоди. ‘Има 8 милиони Албанци и тие се активен дел од европското образование и развој. Сите ќе бидеме заедно во НАТО и ќе живееме без граници, ова е нашата мисија.’- рече Ахмети.“
„Али Ахмети ја истакна визијата за еднаква Македонија, каде што сите народи имаат целосни права и каде што Балканот е мирно подрачје, со економски напредок и стабилност. Собирот во Студеничани беше организиран во рамките на кампањата на Националната алијанса за интеграција и соработка, со цел зајакнување на соживотот и на одржливиот развој на локално и национално ниво.“ – објавија „Алфакс“ и „Тетова сот“