Во својот драматичен статус творецот и сопственик на апликацијата за комуникација Телеграм Павел Дуров открива дека Германија привремено спречила ЕУ да почне со шпионирање на телефоните на сите граѓани.
Дуров преку Телеграм испрати порака до сите свои корисници во Франција во врска со опасноста од контрола на разговорите во која порачува дека луѓето мора да ги знаат имињата на оние кои се обидуваат да им ги украдат слободите.
Според Дуров опасноста од институционално шпионирање на сите разговори на приватните телефони е само моментално одстранета.
,,Денеска, Европската Унија речиси го забрани вашето право на приватност. Требаше да гласа за закон што ќе ги принуди апликациите да скенираат секоја приватна порака, претворајќи го телефонот на секого во алатка за шпионирање.
Франција го предводеше притисокот за овој авторитарен закон. И поранешниот и сегашниот министри за внатрешни работи, Бруно Рејто и Лоран Нуњез, го поддржаа. Минатиот март, тие изјавија дека полицијата треба да ги гледа приватните пораки на француските граѓани. Републиканците и групата Ренесанса на Макрон гласаа за тоа.
Ваквите мерки треба да „се борат против криминалот“, но нивната вистинска цел се обичните луѓе. Тоа нема да ги спречи криминалците – тие би можеле само да користат VPN мрежи или специјални веб-страници за да се сокријат. Пораките на службените лица и полицијата нема да бидат скенирани, бидејќи законот практично ги ослободува од надзор. Само ВИЕ – обичните граѓани – ќе се соочите со опасноста вашите приватни пораки и фотографии да бидат компромитирани.
Денеска, ја браневме приватноста: ненадејниот став на Германија ги спаси нашите права. Но, слободите се уште се загрозени. Додека француските лидери се залагаат за целосен пристап до приватни пораки, основните права на Французите – и на сите Европејци – остануваат во опасност затоа што следното гласање на оваа тема е закажано за до крајот на годинава”, пишува Дуров.