Украинскиот претседател најави програма за бесплатен железнички превоз и ограничувања на цените на горивата за да им помогне на граѓаните да ја пребродат зимата.
Претседателот Володимир Зеленскирече дека железниците треба да им покажат на украинските граѓани дека буџетските средства доделени на државното претпријатие навистина му служат на општеството.
Владата, исто така, ќе развие програма за ублажување на зимските трошоци, слична на минатогодишната, во која 14 милиони Украинци добија нешто повеќе од 20 евра субвенции.
„Дефинитивно ќе ја ограничиме цената на гасот оваа зима, нема да има зголемување, како и цената на електричната енергија за приватните домаќинства“, вети претседателот.
Цената на киловат-час електрична енергија моментално е нешто под 0,09 евра. По руските напади со беспилотни летала и ракети врз електрани и трафостаници во текот на изминатата недела, електричната енергија е достапна во големи делови од земјата само неколку часа на ден.
Дури и пред руската инвазија, која трае од февруари 2022 година, Украина беше најсиромашната земја во Европа според приходот по глава на жител, според пресметките на Меѓународниот монетарен фонд. Речиси половина од државниот буџет на Украина се финансира од странски заеми и средства за помош.