Со примен гол во 10. минута од судиското надополнување на времето, фудбалерите на Шкендија одиграа „само“ нерешено 1:1 со Јагјелонија од Полска на Националната арена „Тодор Проески“ во Скопје во третото коло од групната фаза во Конференциската лига на УЕФА.
„Само“ нерешено зошто македонскиот шампион водеше од 49. минута со голот на Лиридон Љатифи, а во последните четири минути имаше и играч повеќе по исклучувањето поради втор жолт картон на Хесус Имаз, но Серхио Лозано во „фотофинишот“ им го украде вториот триумф на тетовските „црвено-црни“.
Шкендија им го препушти поседот на топката (31:69 проценти) на фаворизираните гости, за кои во минатата сезона настапуваше македонскиот репрезентативец Дарко Чурлинов, но Полјаците имаа само еден удар кон противничката мрежа повеќе (8:7), а во рамките на голот беше израмнето (3:3).
Сепак, и со 4 бода, Шкендија засега е во кругот на екипите што одат понатаму – моментно е на 21. место – а, во следното коло на 27 ноември ќе ѝ гостува на Дрита во Приштина.