Во тешка несреќа на работното место што се случи во понеделникот навечер, 31-годишен државјанин на Република Македонија се здоби со тешки повреди откако беше згмечен меѓу бетонски ѕид и градежна машина во индустриски погон во австриската општина Едт во близина на Ламбах.
Инцидентот се случил околу 19 часот, кога полицијата добила пријава и веднаш излегла на местото на настанот, кадешто пронашла тешко повреден работник чија нога била згмечена од утоварувач со тркала тежок над 15 тони, управуван од 26-годишен сонародник.
По итна интервенција на медицинските служби, повредениот маж бил стабилизиран и пренесен со хеликоптер на итната медицинска помош „Мартин 3“ во болницата во Линц.
Надлежните органи го истражуваат случајот за да утврдат како се случила несреќата.