Осуденик Албанец успеал да избега од затвор во Милано изведувајќи бегство во филмски стил, врзувајќи чаршафи за решетките од прозорецот на својата ќелија, објавија италијанските медиуми.
„Затвореник од албанско потекло, стар 41 година, осуден на отслужување казна до 2048 година, избегал од затворот ‘Опера’ во Милано на најкласичен начин. Тој ги врзал чаршафите еден за друг за решетките на прозорецот и така се спуштил од ќелијата“, изјави Џенарино де Фацио, службеник во италијанската Управа за спроведување кривични санкции, според новинската агенција АНСА.
Тој додаде дека сè уште не е јасно како осудениот Тома Таулант успеал да скокне преку затворскиот ѕид и дали имал помош од надворешни соучесници.
Според Фацио, оваа епизода од бегството од затворот ги покажува недостатоците во политиката на казнените установи во последните 25 години, вклучувајќи ги и најновите случаи.
Тој, исто така, укажа на пренатрупаноста на затворот, додавајќи дека во затворот во Милано моментално има 1.338 осуденици кои ги издржуваат своите казни, а капацитетот на институцијата е 918 затвореници.
Службеното лице додаде дека потрагата по избеганиот затвореник е во тек.
Според АНСА, ова е четврто бегство на Таулант од казнена установа, а последниот пат кога успеал да избега од затвор бил во 2013 година во Парма со друг осуденик.