Претседателката на Европската комисија, Урсула фон дер Лајен, пред почетокот на Европскиот совет во Брисел изјави дека денешните дискусии ќе бидат интензивни, со фокус на финансиската поддршка за Украина.
„Денеска мора да најдеме решение. Нема да го завршиме Европскиот совет без решение за финансирањето на Украина за следните две години. Имаме двете опции и за едната од нив мора да се договориме“, истакна Фон дер Лајен.
Таа потсети на двете предложени опции: буџетско задолжување на ЕУ или заем за репарации (користење замрзнати руски средства).
Во врска со белгиското противење на втората опција, Фон дер Лајен рече: „Апсолутно ја разбирам и ја поддржувам идејата дека ако го прифатиме заемот за репарации, ризикот мора да го споделуваме сите. Тоа е прашање на солидарноста, што е основен принцип на Европската Унија“.
Крајната цел е мир за Украина преку сигурно финансирање за 2026 и 2027 година.
На самитот ќе се разговара и за економски теми, вклучувајќи ја конкурентноста на ЕУ и намалување на зависноста од еден извор. Фон дер Лајен го истакна значењето на договорот со Меркосур: „Тоа е потенцијален пазар од 700 милиони потрошувачи… Затоа е од огромно значење да добиеме зелено светло за Договорот со Меркосур“.
Самитот се одржува во клучен момент за европската поддршка за Украина и економската стратегија на Унијата.