На првата седница на Претседателството на ДУИ по конгресот одржан викендов, вечерва биле донесени одлуки за понатамошното структурирање на партијата, вклучително и избор на нови претседатели на локалните ограноци и партиски функции, информираат од партијата на Ахмети.
Усвоен бил и Правилникот за работа на Претседателството на Централниот одбор.
За шеф на кабинетот на претседателот на ДУИ е именуван Фатон Ахмети, додека за портпарол на партијата Арта Биљали Зендели. Како советник на претседателот Ахмети за односи со Соединетите Американски Држави е назначен Шемседин С. Бекири. Во согласност со новиот статут, именувани се и претседатели на ограноците: Бајрам Реџепи во Тетово, Ридван Асани во Куманово, Фатон Положани во Струга, Валдет Џафери во Гостивар и д-р Бујар Османи во Чаир.
Новата портпаролка не ги коментираше изјавите на Тимчо Муцунски и Венко Филипче поврзани со изјавата на Али Ахмети за Југославија, нагласувајќи дека фокусот на партијата е насочен кон внатрешното организирање и развој.
На седницата се разговарало и за организацијата на секретаријатите.