Лина Ѓорческа в недела патува за Мелбурн, кадешто ќе се обиде да влезе во историјата на македонскиот тенис како прва Македонка што заиграла на главниот турнир на гренслемот Австралија опен.
„Во јануари е почетокот на сезоната и не може да се има поубав старт од Австралија опен. Се подготвувам за успешен настап. Еднаш бев многу блиску и се надевам дека сега ќе го скршиме мразот и ќе изборам пласман на главниот турнир. Сон на секој тенисер е да учествува на гренслем турнирите, така и за мене. Се надевам дека ќе имам учество и на главниот турнир, но оваа година ќе има и настапи на повеќе ВТА-турнири“, вели најдобрата македонска тенисерка пред заминувањето на првиот гренслем во сезоната.
За 31-годишната тетовка ова ќе биде трета среќа во Австралија, кадешто најблиску до главниуот турнир беше во дебито во 2017 година, кога стигна до третото и последно квалификациско коло, а во 2024 година беше елиминирана на стартот.
Во својот трет обид првиот женски рекет на Македонија ќе настапи како 204. на ВТА-листата во сингл, а прва носителка во квалификациите е Полина Кудерметова (104.) од Узбекистан.