Христијанските верници денеска го празнуваат празникот Свети Трифун, заштитникот на лозарите, градинарите и винарите. Празникот, кој традиционално се слави на 14 февруари, има силно духовно и народно значење, особено во лозарските региони низ земјата.
Според верувањето на нашиот народ тој е заштитник на лозјата и градините од разни штети и несреќи. Поради тоа луѓето го слават и во негова чест на овој ден се започнува со кроењето на лозјата.
Наутро во црквите свештениците пеат молитви и се свет вода. Луѓето земаат од светата вода и ги прскаат лозјата за да бидат заштитени од секакви несреќи. По ова се закројуваат неколку лозници.
Според преданието, Свети Трифун бил христијански маченик од 3 век, роден во Мала Азија, познат по својата вера и исцелителски дарби. Се верува дека уште како млад имал моќ да лекува болести и да истерува зли духови, поради што бил почитуван меѓу народот.
Но, поради својата вера бил погубен за време на прогонот на христијаните во Римското Царство.
Во народната традиција, овој ден е поврзан со почетокот на лозарската сезона. Лозарите излегуваат во нивите и симболично ги закројуваат лозите, полевајќи ги со вино и посакувајќи бериќетна година.
Се прави и мал обред со погача и варено жито, а домаќинот се избира за „цар на лозјата“ доколку најмногу му „тече“ виното од закроената лоза – што симболизира плодност и добра берба.
Свети Трифун се смета за предвесник на пролетта и надеж за родна година, а празникот претставува спој на верата, традицијата и вековната култура на одгледување лоза и производство на вино во Македонија.