Во Општина Кисела Вода се одржа нов отворен ден посветен на директни средби и комуникација со граѓаните. Градоначалничката Бети Стаменкоска Трајкоска, заедно со советници од Град Скопје, оствари средби со околу 50 жители, а беа реализирани и над 20 телефонски разговори со граѓани кои ги презентираа своите барања, идеи и предлози.
Главната заложба на овие средби е секој жител што има потреба да биде сослушан. Преку непосредниот контакт се создава простор за искрен разговор и се бараат заеднички решенија кои директно ќе придонесат за поквалитетен живот. Ваквиот транспарентен начин на комуникација овозможува навремено согледување на секојдневните предизвици со кои се соочуваат жителите и ефикасно постапување при нивното решавање.
Приемните денови се организираат за време на викендот, односно во сабота, со цел да им се излезе во пресрет на граѓаните и да им се олесни одвојувањето време надвор од нивните редовни работни обврски. Отворените денови за средби со граѓаните ќе продолжат да се реализираат со истата динамика и во наредниот период.
Сите заинтересирани граѓани кои сакаат да остварат средба, можат да закажат свој термин на телефонскиот број 02/2785-401, каде што ќе ги добијат сите потребни информации околу точниот датум и време.