За време на посета на скопската зоолошка градина група ученици од средното угостителско училиште „Лазар Танев“ фрлале камења по слоницата, а за тоа време професорите пиеле кафе во кафетерија во градината и не реагирале, објави зоонегувателот Виктор на својот профил на Фејсбук.
„Денеска имав ситуација што искрено ме разочара. Група ученици од средното угостителско „Лазар Танев“ фрлаа камења кон слоницата, додека нивните професори седеа на кафе во кафич. Не сакам да генерализирам – не се сите деца исти, ниту сите професори се неодговорни, но вакви поединци оставаат лоша слика и, уште полошо, нанесуваат стрес и штета на животни кои се под наша грижа. Како зоонеговател, секојдневно гледам колку се чувствителни и интелигентни овие суштества. За нив, ова не е игра“ – сподели тој во својата објава.
Во постот тој вели дека за инцидентот бил информиран директорот на училиштето и дека тој „изреагирал“.
„Се надевам дека ќе има некакви реперкусии за ова однесување“ – пишува негувателот на животни во скопската зоолошка градина.