Опозициската СДСМ со остри обвинувања кон владата и премиерот Христијан Мицкоски оцени дека тој директно го блокира европскиот пат на државата со одбивањето да ги исполни условите за продолжување на преговорите со Европската Унија.
Од партијата велат дека изјавите на Мицкоски, во кои категорично одбива да отстапи од ставот за уставните измени и дека државата може да чека „со децении“, се спротивни на јасните европски барања.
„Мицкоски јавно и јасно изјави дека нема да отстапи ниту милиметар и дека Бугарите нема да влезат во Уставот, што е основа за продолжување на преговорите. Нема продолжување на преговорите додека не се внесат малцинствата во Уставот – јасна е пораката на Европа“, се наведува во соопштението на СДСМ.
Партијата нагласува дека станува збор за европско, а не за билатерално прашање.
„Ова не е бугарско прашање, туку европско прашање“, велат од СДСМ и се повикуваат на пораките од европски претставници, меѓу кои и поранешната специјална претставничка на ЕУ, Марта Кос, која порача дека „нема место за тројански коњи“.
СДСМ обвинува дека политиките на актуелната власт водат кон стагнација на евроинтегративниот процес и оддалечување на земјата од Европската Унија.
„Потоа истиот Мицкоски додаде дека Македонија е подготвена да чека децении ако треба. Тоа е директно блокирање на европскиот пат на Македонија“, се вели во реакцијата.
Од СДСМ додаваат дека нивниот став е јасен – исполнување на европските услови за продолжување на преговорите – и отфрлаат обвинувањата дека токму тие го кочат процесот.
„СДСМ бара исполнување на европските услови. Мицкоски отворено вели дека нема да ги исполни и дека е подготвен да чека децении. Кој всушност го блокира ЕУ патот?“, прашуваат од партијата.
Во соопштението се најавува дека СДСМ ќе продолжи со политичка борба за европска иднина на земјата.