Проектот LIFE DinPin Bear ќе се спроведува до 2031 година во девет европски земји. Како дел од активностите, институцијата ќе спроведува теренски истражувања преку мониторинг, поставување стапици со камери и собирање научни податоци за дистрибуцијата и движењето на кафеавите мечки (Ursus arctos).
Паркот информира дека некои од инсталираните камери веќе се оштетени, најверојатно од мечки во потрага по храна, што укажува на нивно активно присуство на територијата.
Според податоците од 2025 година, популацијата на мечки во паркот покажува стабилен тренд, со зголемен број на младенчиња. Главните предизвици се отпадот и човековото вознемирување, додека се регистрирани и поединечни случаи на материјална штета.
Националниот парк ги повикува посетителите и локалното население да не оставаат отпадоци и храна надвор и да ги почитуваат природните живеалишта, со цел да се избегнат несакани средби со диви животни.
Проектот предвидува активности за намалување на фрагментацијата на живеалиштата, подобрување на коегзистенцијата меѓу луѓето и мечките, зајакнување на управувањето и законската рамка, како и промовирање на прекуграничната соработка и вклучување на локалните заедници.