Министерот за одбрана Пит Хегсет се соочи со речиси шестчасовно испрашување од пратениците во Претставничкиот дом за прв пат откако администрацијата на Трамп ја започна војната против Иран, што демократите ја оспорија како скап конфликт воден без одобрение од Конгресот.
Администрацијата на Трамп тврди дека „часовникот“ за воена акција Во Иран е „ресетиран“ по прекинот на огнот што започна на почетокот на април.
Тоа е став што би ѝ овозможил на Белата куќа да ја избегне потребата од одобрение од Конгресот за продолжување на непријателствата, објави АП.
Овој аргумент го изнесе министерот за одбрана Пит Хегсет за време на сослушувањето во Сенатот во четврток, кога рече дека прекинот на огнот ефикасно го завршил конфликтот.
Според тоа толкување, администрацијата не го активирала барањето од Резолуцијата за воени овластувања од 1973 година за барање одобрение од Конгресот за воена акција што трае повеќе од 60 дена.
Висок функционер на администрацијата, кој побара анонимност, рече дека, „непријателствата… престанаа“, додавајќи дека немало размена на оган меѓу американските сили и Иран откако започна прекинот на огнот на 7 април.
Функционерот рече дека оттогаш, американските сили и Иран не се вклучиле во директен конфликт, иако прекинот на огнот е продолжен.
Претходно „Тајм“ објави дека демократите би можеле да го тужат американскиот претседател Доналд Трамп ако тој продолжи со воената акција против Иран по 1 мај без да добие одобрение од Конгресот.
Овој рок е пропишан со Резолуцијата за воени овластувања од 1973 година, позната и како Закон за воени овластувања.
,Претседателот е должен да го извести Конгресот во рок од 48 часа од испраќањето на американските сили во странство за да се вклучат во борба што Трамп го стори.
Освен ако Конгресот не прогласи војна или не даде експлицитно овластување за употреба на воена сила, претседателот може да ја спроведе операцијата само во период до 60 дена. По тие 60 дена, законот предвидува дополнителни 30 дена за безбедно повлекување на трупите доколку нема одобрение од законодавното тело. Така, вкупниот период може да достигне 90 дена во одредени ситуации.
Законот беше донесен на 7 ноември 1973 година, како одговор на Виетнамската војна и тајното бомбардирање на Камбоџа. Тогашниот претседател Ричард Никсон стави вето на законот, но Конгресот успеа да го поништи со двотретинско мнозинство, со што го усвои.