Свлечиштето кај градилиштето во близина на Католичката црква во Скопје повеќе не е само инцидент на терен, туку случај што оди кон институции, казни и можна професионална одговорност. Општина Центар соопшти дека по увидот на инспекциските служби се изречени најстроги законски казни, а ќе се бара и одземање на лиценците на одговорните лица вклучени во изградбата.
Инспекцискиот надзор бил спроведен во координација со МВР, Државниот градежен инспекторат и Секторот за урбанизам. На терен биле констатирани сериозни оштетувања на јавната инфраструктура, меѓу кои коловоз, тротоар, канализациска мрежа и улично осветлување. Според Општина Центар, дополнително биле утврдени и неправилности во градежните активности.
Поради состојбата на терен и можните ризици, Општина Центар побарала стручна експертиза од професори на Градежниот факултет. Нивното мислење треба да помогне во проценката на настанатата состојба, ризиците и мерките што треба да се преземат за санација.
Деканот на Градежниот факултет, проф. д-р Јосиф Јосифовски, изјави дека вчерашниот инцидент во општина Центар, каде при ископ на градежна јама настанало свлечиште на земјата, е сериозен сигнал за потребата од нови прописи и стандарди во градежништвото.
- Ние сме техничка професија која е регулирана, што значи дека постојат јасни правила и стандарди за тоа како треба да се однесуваме, како да градиме и како да проектираме. Меѓутоа, и покрај тоа, се случуваат случаи како неодамнешниот – повторно затрупување на градежна јама – што е краен сигнал дека мора да се преземат сериозни мерки – изјави Јосифовски пред настанот „Од Амфитеатар до реализација- од студент до менаџер“.
Според него, постојните правила не се доволни за да се спречат вакви ризици.
- Според моето лично убедување, а и по консултацијата со градоначалникот утринава, неопходно е да се пропишат нови процедури и стандарди кои ќе обезбедат спречување на вакви појави во иднина. За среќа, овој пат немаме човечки жртви, но имаме материјална штета и опасност од проширување на проблемот, со можност за оштетување на соседните објекти – рече тој.
Тој додаде дека по консултацијата со градоначалникот и инспекторот е договорено Градежниот факултет да излезе на терен и да направи проценка за опасноста врз соседните објекти.
- Она што беше договорено во разговорот со градоначалникот и инспекторот е дека во најбрзо време Градежниот факултет ќе излезе на терен за да направи проценка за опасноста врз соседните објекти и да предложи мерки и понатамошни чекори за интервенција, односно санација – дополни тој.
Според информациите од Министерството за внатрешни работи, вчера околу 13:30 часот на ул. „Христо Смирненски“ во општина Центар, при ископ на дупка за изградба на зграда со багер, настанало свлечиште на земјата. Машината била затрупана, но возачот навреме успеал да излезе. Од инцидентот оштетени се делови од тротоарот и улицата, паднала бандера која оштетила возило „дачија сандеро“.
Општинските екипи веќе поставиле сигурносни појаси и предупредувачки ленти за да се обезбеди просторот, бидејќи градилиштето се наоѓа во непосредна близина на станбени објекти. Инвеститорот е задолжен итно да ја обезбеди локацијата, да преземе мерки за санација врз основа на експертизата и целосно да ја врати оштетената инфраструктура во првобитна состојба.
Од Општина Центар информираат дека до Основното јавно обвинителство веќе е доставено официјално известување за понатамошно постапување. Градежниот инспектор ќе бара одземање на лиценците на одговорните лица, а општината најавува дека ќе бара и утврдување одговорност од надзорот и изведувачот поради, како што велат, несоодветно и несовесно постапување.
Случајот првично го алармираше здружението „Во одбрана на Буњаковец“, кое објави видео од свлечиштето на градилиштето на спојот на улицата „Христо Смирненски“ и булеварот „Митрополит Теодосиј Гологанов“. Според МВР, при ископ за изградба на зграда биле оштетени делови од тротоарот и улицата, а паднала и бандера врз паркирано возило.
Во инцидентот бил затрупан и багерот што работел на градилиштето, но работникот кој управувал со него навреме успеал да излезе. Тоа е деталот што најдобро покажува колку ваквите „градежни неправилности“ можат за секунди да станат прашање на човечки живот.
Од Општина Центар порачуваат дека нема да толерираат неодговорно однесување на инвеститори со кое се загрозува безбедноста на граѓаните и се уништува јавниот простор. Општинските служби најавуваат дека ќе останат на терен сè до целосно отстранување на последиците. Во град каде секоја втора улица личи на градилиште, ова не е само локален проблем на една парцела. Ова е тест дали институциите ќе реагираат пред, а не по следната несреќа.